explicación do logo conmemorativo

O logo conmemorativo do décimo aniversario da mostra de curtas trata de reinterpreta-lo logotipo oficial da mostra, que a representa dende a pasada edición, adaptando a súa linguaxe visual ao novo contido: a primeira década de vida da mostra de curtametraxes. Para iso mantívose como elemento distintivo o texto e a súa tipografía, e sustituíuse a pantalla de cinema iluminada con luz branca por dez pequenas formas dispostas dun xeito que poderían ser interpretadas como pasos, como un camiño, o traxecto de dez anos que leva transcurrida a mostra, ademais de seren pequenas pantallas de cinema que se refiren a cada unha das dez edicións. Finalmente, e cunha nova tipografía, o texto “10 anos” encaixado no logo e en combinación cromática coas dez pequenas pantallas. As cores: o verde e o rosa. O primeiro, como sinónimo de bo progreso, de que todo leva transcurrindo ben, de que a mostra pode continuar así moitos anos. O rosa, como recordo ao maxenta como cor primaria, dado que esta edición suporá un pequeno punto de inflexión na Mostra, un comezar para mellor de novo, ademáis de transmitir felicidade e optimismo cara ao que o logo quere evocar.